Owayengumholi wophiko lwentsha lwe-ANC e-KZN utholakale eshonile, isidumbu silahlwe emfuleni

Owayengumholi wophiko lwentsha lwe-ANC KwaZulu-Natal utholakale eshonile, isidumbu sakhe silahlwe emfuleni

Utholwe eshonile obengumholi wophiko lwentsha lwe-ANC KwaZulu-Natal, isidumbu sakhe saphoswa emfuleni eDonnybrook eningizimu yesifundazwe saKwaZulu-Natal.

Isidumbu sikaMduduzi Memela sitholwe sinenxeba lokugwazwa entanyeni kanti kubikwa ukuthi amehlo akhe abekhishwe ngaphandle.

UMemela ubengunobhala wesibili wophiko lwentsha kulesi sifunda futhi wathatha izintambo kuThabiso Zulu owayelwa nenkohlakalo. Ngesikhathi eshona ubesebenza njengojikelele kuMasipala wesiFunda iHarry Gwala ophethwe yi-ANC edolobheni eXobho.

Ngokusho kwabangani bakhe abakhulume ne-African Times bacela ukuthi igama labo lingadalulwa, unyamalale isikhashana watholwa eshonile ngempelasonto.

“Utholwe eshonile ngendlela engaqondakali kanti abanye bethu basola ukuthi kukhona umdlalo ongcolile kukho konke lokhu. Amaphoyisa kumele aphenye kabanzi ngalolu daba,” kusho omunye wabangani bakaMemela.

Indawo yobugebengu kubikwa ukuthi inakekelwe amaphoyisa asesiteshini saseDonnybrook kanti uphenyo luyaqhubeka ukuze kutholakale umnyombo ngokufa kwakhe.

USihlalo we-ANC esifundeni, uMnuz Zamo Nxumalo, ukuqinisekisile ukushona kukaMemela, kodwa wathi mincane imininingwane ngokwenzekile.

“Sazisiwe ngalolu daba futhi njenge-ANC esifundeni besisahlela ukuvakashela umndeni kaMemela ukuzokhalisa,” kusho uNxumalo, ophinde abe yiMeya yesifunda iHarry Gwala.

Ekuqaleni kwesonto eledlule i-ANC eMandeni, KwaZulu-Natal, ilahlekelwe ngelinye lamakhansela ayo, uMnuz Phendukani Mabhida, odutshulwe wabulawa izigebengu ezimbili eseziboshiwe manje. Ngaphambi kokuthi abulawe uMabhida ukhale ngokuthi i-ANC ibivika izikhulu ezinenkohlakalo kumasipala waseMandeni nalapho ebeyikhansela khona.