Owesilisa utholwe engenacala ngemuva kokuboshelwa ukudlwengula umfundi ngo-2014

Owesilisa utholwe engenacala ngemuva kokuboshelwa ukudlwengula umfundi ngo-2014. 

ULuyanda Botha udonse udilikajele ngecala lokudlwengula nokubulala u-Uyinene Mrwetyana

Umdlwenguli owalahlwa yicala lokudlwengula uLuyanda Botha ngoMsombuluko utholwe engenacala ngecala lokuzama ukudlwengula umfundi wasekolishi labahlengikazi eminyakeni eyishumi edlule eKapa.

Owayeyisisebenzi saseposini udonsa kanzima ejele ngecala lokudlwengula nokubulala isitshudeni saseNyuvesi yaseKapa u-Uyinene Mrwetyana ngo-2019.

Isikhalo sokuzama ukudlwengula sisukela esehlakalweni sangoJuni 2014 ekolishi labahlengikazi e-Athlone.

Ubufakazi obethulwe enkantolo yesifunda saseWynberg bukhomba ukuthi uBotha ungene ezindlini zokugezela zasekolishi wabuka phezu kweshawa, wethusa ummangali.

“Ngakholwa wukuthi ngalesi sikhathi lo mlisa ubefuna ukungidlwengula njengoba kuxakile ukuthi owesilisa angene eshaweni wesifazane ebabuka eshawa,” usho kanje. Utshele inkantolo ukuthi walwa naye.

UBotha akazange akuphike ukuziphatha kwakhe ngalolu suku kodwa uthe isenzo sakhe siwumphumela wokucindezeleka emoyeni ebudlelwaneni bakhe.

IMantshi u-Anthea Ramos uthe esinqumweni sakhe, ngokusekelwe ebufakazini obunikezwe ummangali, kwakunengqondo kuye ukukholelwa ukuthi uBotha wayefuna ukumdlwengula. Kodwa-ke, inkantolo bekumele icubungule ukuthi isenzo sakhe sikhomba ukuthi uhlose ukudlwengula ummangali.

UBotha watholwa engufakazi omuhle ubufakazi bakhe bafakazelwa yintombi yakhe yakudala - ongumfundi ekolishi labahlengikazi - owafakaza ukuthi babevumelene ngokuhlangana ngalolu suku. Uthe efika ekolishi akazange amthole wabe eseyombheka ezindlini zokugezela, wezwa kugeleza amanzi.

URamos uthe nakuba isizathu sikaBotha sokungena ezindlini zokugezela sasixakile, inqobo nje uma kungenzeka ukuthi kuyiqiniso, inkantolo kwakufanele imnikeze ukungabaza. Akunakushiwo ukuthi icala lifakazelwe ngaphandle kokungabaza okunengqondo.

Ummangali ubike isigameko kwabanye ofakazi ababili abethula ubufakazi. Nokho omunye uthe ummangali ubesopha emlonyeni kanti omunye akakusho lokho. Umphenyi wecala akazange abone lutho oluxakile ngesikhathi ummangali emnikeza isitatimende.

Ummeli uKyle Petersen, omele uBotha, uthe: “Ikhasimende lami lijabule ngomphumela futhi nami ngisijabulele isinqumo. Kwakuyisinqumo esihle, esingachemile futhi sasebenzisa umthetho ngendlela efanele. Yingakho akhululwa. Ngijabulile. Engangikufuna nje wukummela kahle futhi ngicabanga ukuthi ngikwenzile lokho.”