UBabes Wodumo, ogama lakhe langempela nguBongekile Simelane-Maphumulo waseLamontville, eningizimu yeTheku, usanda kuvela enkantolo ehamba noyise uMbhishobhi Welcome Simelane.
Lesi sihlabani somculo we-gqom esiliphikayo icala sibhekene namacala okushaya ngezinsolo zokuhlasela umsiki wengqephu waseThekwini uPhilile “Philly” Mhlongo weSK Designs ngomhla zingu-12 kuNdasa-2024.
Icala lakhe lokushaya lezinsuku ezintathu liqale ngoLwesine, zingu-23 kuMasingana, eNkantolo yeMantshi yaseThekwini.
Isigameko kusolakala ukuthi senzeke emagcekeni ebhizinisi likaPhilile eWest Walk, West Street, eThekwini.
Ngesikhathi kuqhubeka icala, uPhilile wethula ubufakazi bokuthi uBabes usolwa ngokumshaya ngempama ebusweni, kanti sonke isigameko saqoshwa ngekhamera.
Uveze ukuthi ngemuva kwalesi sigameko, wacela ivideo kumphathi wesitolo, owamvumela ukuthi ayibuke kodwa wangakwazi ukumnika ikhophi.
UPhilile wabe eseqopha isithombe kumakhalekhukhwini wakhe, wasidlulisela ku-USB, wabe esesinikeza umphenyi wecala.
Ummeli kaBabes, uThula Mlondo, ukuphonsele inselelo ukuvunywa kwesithombe, engabaza inqubo eyalandelwa ukuze sitholwe.
0 Comments